1ܐَܢܵܫܹ̈ܐ ܐܲܚܘܿܢܘܵܬܹ̈ܐ ܘܒܵܒܵܘܵܬܹ̈ܐ؛ ܫܡܸܥܡܘܿܢ ܓ̰ܘܼܘܵܒܝܼ ܕܠܟܸܣܠܵܘܟܼܘܿܢ ܐܵܕܝܼܵܐ. 2ܘܟܲܕ ܫܡܸܥܠܗَܘܿܢ ܕܒܠܸܫܵܢܵܐ ܕܥܸܒܼܪ̈ܵܝܹܐ ܗܲܡܙܘܼܡܹܐ ܗَܘܵܐ ܥܲܡܵܝܗܝ ܒܘܼܫ ܙܵܘܕܵܐ ܫܠܹܐܠܗܘܿܢ؛ ܘܐَܡܸܪܹܗ ܐܸܠܵܝܗܝ؛ 3ܐܵܢܵܐ ܓܲܒܼܪܵܐ ܝܗ݇ܘܼܕܵܝܵܐ ܝܘܸܢ؛ ܗ݇ܘܝܼܵܐ ܓܵܘ ܛܲܪܣܘܿܣ ܕܩܝܼܠܝܼܩܝܵܐ؛ ܐܝܼܢܵܐ ܦܸܫܠܝܼ ܓܘܼܪܘܸܣܵܐ ܒܐܵܗܵܐ ܡܕܝܼܢ݇ܬܵܐ؛ ܠܟܸܣ ܐܲܩܠܵܬܹ̈ܐ ܕܓܵܡܠܝܼܐܹܝܠ؛ ܘܦܸܫܠܝܼ ܬܘܼܥܠܡܵܐ ܒܬܲܡܵܡܵܬܘܼܬܵܐ ܒܢܵܡܘܿܣܵܐ ܕܐܲܒܼܵܗ̈ܵܬܲܢ؛ ܘܛܲܢܵܢܵܐ ܕܐܵܗܵܐ ܝ݇ܘܸܢ ܗَܘܵܐ؛ ܕܵܐܟܼܝܼ ܕܐܘܼܦ ܐܲܚܬܘܿܢ ܟܠܵܘܟܼܘܿܢ ܝܼܬܘܿܢ ܐܸܕܝܘܿܡ݇. 4ܘܠܐܵܗܵܐ ܐܘܼܪܚܵܐ ܛܪܸܕܠܝܼ ܗܲܠ ܡܵܘܬܵܐ؛ ܟܲܕ ܒܹܐܣܵܪܵܐ ܝ݇ܘܸܢ ܗَܘܵܐ ܘܣܵܦܘܿܝܹܐ ܐ݇ܢܵܫܹ̈ܐ ܘܒܲܟܼܬܵܬܹ̈ܐ ܠܒܹܝܬ ܐܲܣܝܼܪܹ̈ܐ. 5ܕܵܐܟܼܝܼ ܕܒܸܣܗܵܕܵܐ ܝ݇ܠܹܗ ܥܲܠܝܼ ܓܘܼܪܵܐ ܕܟܵܗܢܹ̈ܐ؛ ܘܟܠܵܝܗܝ ܚܘܵܪ̈ܕܸܩܢܹܐ؛ ܕܡܸܢܵܝܗܝ ܫܩܸܠܝܼ ܟܬܵܒܼܹ̈ܐ ܠܟܸܣ ܐܲܚܘܿܢܘܵܬܹ̈ܐ ܘܐَܙܸܠܝܼ ܠܕܲܪܡܣܘܿܩ؛ ܕܐܘܼܦ ܠܐܵܢܝܼ ܕܐܝܼܬ ܗَܘܵܘ ܬܵܡܵܐ ܡܲܝܬ݇ܝܸܢ ܗَܘܵܐ ܠܗ݇ܘܿܢ ܠܐܘܿܪܸܫܠܸܡ ܐ݇ܣܝܼܪܹ̈ܐ؛ ܕܩܵܒ̇ܠܝܼ ܬܲܢܒܵܐ. 6ܘܗ݇ܘܹܐܠܵܗ̇ ܟܲܕ ܒܹܐܙܵܠܵܐ ܝ݇ܘܸܢ ܗَܘܵܐ؛ ܘܩܘܼܪܒܸܢܝܼ ܠܕܲܪܡܣܘܿܩ؛ ܐܲܝܟܼ ܒܦܲܠܓܹܗ ܕܝܵܘܡܵܐ؛ ܡܸܢܫܸܠܬܵܢܹܐ ܡ̣ܢ ܫܡܲܝܵܐ ܙܪܸܩܠܹܗ ܒܲܗܪܵܐ ܪܵܒܵܐ. 7ܘܢܦܸܠܝܼ ܥܲܠ ܐܲܪܥܵܐ؛ ܘܫܡܸܥܠܝܼ ܩܵܠܵܐ ܒܹܐܡܵܪܵܐ ܐܸܠܝܼ؛ ܫܵܐܘܿܠ ܫܵܐܘܿܠ؛ ܩܵܡܘܿܕܝܼ ܒܸܛܪܵܕܝܼ ܝَܘܸܬ؛ 8ܘܐܵܢܵܐ ܓ̰ܘܼܘܸܒܠܝܼ؛ ܡܵܢܝܼ ܝَܘܸܬ؛ ܡܵܪܝܼ؛ ܘܗ̇ܘ ܐَܡܸܪܹܗ ܐܸܠܝܼ ܐܵܢܵܐ ܝܼܫܘܿܥ ܢܵܨܪܵܝܵܐ ܝܘܸܢ؛ ܗ̇ܘ ܕܐܲܢ݇ܬ ܒܸܛܪܵܕܵܐ ܝَܘܸܬ. 9ܘܐَܢܵܫܹ̈ܐ ܕܝܼܗَܘܵܘ ܥܲܡܝܼ ܚܙܹܐܠܗ݇ܘܿܢ ܒܲܗܪܵܐ ܐܝܼܢܵܐ ܩܵܠܵܐ ܕܗ̇ܘ ܕܗܲܡܙܘܼܡܹܐ ܗَܘܵܐ ܥܲܡܝܼ ܠܵܐ ܫܡܸܥܠܗ݇ܘܿܢ. 10ܘܐ݇ܡܸܪܝܼ؛ ܡܘܼܕܝܼ ܥܵܒܼܕܸܢ؛ ܡܵܪܝܼ؟ ܘܡܵܪܲܢ ܐَܡܸܪܹܗ ܐܸܠܝܼ؛ ܩܘܼܡ݇ ܙܹܠ݇ܐ ܠܕܲܪܡܣܘܿܩ؛ ܘܬܵܡܵܐ ܒܸܬ ܦܵܐܹܫ ܗܘܼܡܙܸܡܵܐ ܥܲܡܘܼܟܼ ܥܲܠ ܟܠ ܡܸܢܕܝܼ ܕܦܝܵܫܵܐ ܝ݇ܠܹܗ ܦܩܝܼܕܵܐ ܐܸܠܘܼܟܼ ܕܥܵܒܼܕܸܬ. 11ܘܟܲܕ ܠܹܐ ܚܵܙܸܢ ܗَܘܵܐ ܡ̣ܢ ܚܸܩܪܹܗ ܕܗ̇ܘ ܒܲܗܪܵܐ؛ ܕܒܼܝܼܩܸܢܗَܘܿܢ ܒܐܝܼܕܝܼ ܐܵܢܝܼ ܕܝܼܗَܘܵܘ ܥܲܡܝܼ؛ ܘܥܒܼܸܪܝܼ ܠܕܲܪܡܣܘܿܩ. 12ܘܚܲܕ݇ ܓܲܒܼܪܵܐ ܚܲܢܲܢܝܵܐ؛ ܟܹܐܢܵܐ ܒܢܵܡܘܿܣܵܐ؛ ܕܵܐܟܼܝܼ ܕܒܝܼܵܗ݇ܒܼܵܐ ܗَܘܵܘ ܣܵܗܕܘܼܬܵܐ ܥܲܠܘܼܗܝ ܟܠܵܝܗܝ ܝܗ݇ܘܼܕܵܝܹ̈ܐ ܕܥܡܝܼܪܹܐ ܝ݇ܢܵܐ ܬܵܡܵܐ؛ 13ܐ݇ܬܹܐܠܹܗ ܠܟܸܣܠܝܼ؛ ܘܟܠܹܐܠܹܗ ܘܐَܡܸܪܹܗ ܐܸܠܝܼ؛ ܫܵܐܘܿܠ ܐܲܚܘܿܢܝܼ؛ ܚܙܝܼ. ܘܗܲܪ ܒܗ̇ܝ ܣܵܥܲܬ ܦܸܫܠܗَܘܿܢ ܦܬܝܼܚܹ̈ܐ ܥܲܝܢܵܬ̈ܝܼ ܘܚܸܪܝܼ ܒܝܼܹܗ. 14ܘܐَܡܸܪܹܗ ܐܸܠܝܼ؛ ܐܲܠܵܗܵܐ ܕܐܲܒܼܵܗ̈ܵܬܲܢ ܩܲܡ ܡܲܩܸܡܠܘܼܟܼ ܠܝܼܕܵܥܝܵܐ ܪܸܙܵܝܹܗ ܘܠܸܚܙܵܝܵܐ ܠܗ̇ܘ ܙܲܕܝܼܩܵܐ؛ ܘܠܸܫܡܲܥܝܵܐ ܩܵܠܵܐ ܡ̣ܢ ܦܘܼܡܹܗ. 15ܣܵܒܵܒ ܒܸܬ ܗܵܘܸܬ ܐܸܠܹܗ ܣܵܗܕܵܐ ܠܟܸܣ ܟܠܵܝܗܝ ܒܢܲܝ̈ܢܵܫܵܐ؛ ܥܲܠ ܕܐܵܢܝܼ ܕܚܙܹܐܠܘܼܟܼ ܘܫܡܸܥܠܘܼܟܼ. 16ܘܐܵܕܝܼܵܐ ܩܵܡܘܿܕܝܼ ܥܲܪܩܘܼܠܹܗ ܝܘܸܬ؛ ܩܘܼܡ݇ ܥܡܘܿܕ ܘܚܲܠܸܠ ܡ̣ܢ ܚܛܝܼܵܬ̈ܘܼܟܼ ܟܲܕ ܒܸܩܪܵܝܵܐ ܝَܘܸܬ ܠܫܸܡܹܗ. 17ܘܗ݇ܘܹܐܠܵܗ̇ ܒܕܝܵܪܬܝܼ ܠܐܘܿܪܸܫܠܸܡ؛ ܘܟܲܕ ܨܘܼܠܹܐܠܝܼ ܓܵܘ ܗܲܝܟܠܵܐ. 18ܘܚܙܹܐܠܝܼ ܒܚܸܙܘܵܐ ܟܲܕ ܒܹܐܡܵܪܵܐ ܐܸܠܝܼ؛ ܡܲܠܝܸܙ ܘܦܠܘܿܛ ܠܘܼܟܼ ܡ̣ܢ ܐܘܿܪܸܫܠܸܡ؛ ܣܵܒܵܒ ܠܹܐ ܩܵܒ̇ܠܝܼ ܣܵܗܕܘܼܬܘܼܟܼ ܒܵܗ݇ܣܝܼ. 19ܘܐܵܢܵܐ ܐ݇ܡܸܪܝܼ؛ ܡܵܪܝܼ؛ ܐܵܢܝܼ ܟܹܐ ܝܵܕܥܝܼ ܕܐܵܢܵܐ ܣܵܦܘܿܝܹܐ ܝ݇ܘܸܢ ܗَܘܵܐ ܠܒܹܝܬܼ ܐܲܣܝܼܪܹ̈ܐ؛ ܘܒܸܡܚܵܝܵܐ ܝ݇ܘܸܢ ܗَܘܵܐ ܓܵܘ ܟܠܵܝܗܝ ܟܢܘܼܫܝܵܬܹ̈ܐ؛ ܠܐܵܢܝܼ ܕܗܲܡܸܢܝܼ ܗَܘܵܘ ܒܝܼܘܼܟܼ. 20ܘܟܲܕ ܦܝܵܫܵܐ ܗَܘܵܐ ܫܘܼܦܟܼܵܐ ܕܸܡܹܗ ܕܐܸܣܛܲܦܵܢܘܿܣ ܣܵܗܕܘܼܟܼ؛ ܐܘܼܦ ܐܵܢܵܐ ܥܲܡܵܝܗܝ ܟܸܠܝܵܐ ܝ݇ܘܸܢ ܗَܘܵܐ ܘܫܠܝܼܡܵܐ ܠܩܸܛܠܘܼܗܝ؛ ܘܒܸܢܛܵܪܵܐ ܝ݇ܘܸܢ ܗَܘܵܐ ܓ̰ܘܼܠܹ̈ܐ ܕܐܵܢܝܼ ܕܪܲܓ̰ܡܝܼ ܗَܘܵܘ ܠܹܗ. 21ܘܐَܡܸܪܹܗ ܐܸܠܝܼ؛ ܙܹܠ݇؛ ܕܐܵܢܵܐ ܒܸܬ ܫܵܕܪܸܢܘܼܟܼ ܠܪܸܚܩܵܐ ܠܡܲܟܪܘܼܙܹܐ ܠܛܵܝܸܦܹ̈ܐ. 22ܘܟܲܕ ܫܡܸܥܠܗَܘܿܢ ܐܸܠܹܗ ܗܲܠ ܐܵܗܵܐ ܗܹܡܸܙܡܵܢ؛ ܘܡܘܼܪܸܡܠܗܘܿܢ ܩܵܠܵܝܗܝ ܘܐ݇ܡܸܪܗܘܿܢ؛ ܦܵܐܹܫ ܫܩܝܼܠܵܐ ܡ̣ܢ ܐܲܪܥܵܐ ܗ̇ܘ ܕܗܲܕܟܼܵܐ ܝ݇ܠܹܗ؛ ܣܵܒܵܒ ܠܹܐ ܝ݇ܠܵܗ̇ ܘܵܓ̰ܸܒ ܐܸܠܹܗ ܠܸܚܵܝܵܐ. 23ܘܟܲܕ ܡܲܩܘܸܚܝܼ ܗَܘܵܘ ܘܪܲܦܝܼ ܗَܘܵܘ ܓ̰ܘܼܠܵܝܗܝ؛ ܘܡܵܣܩܝܼ ܗَܘܵܘ ܬܵܘܙ ܓܵܘ ܗܵܘܵܐ؛ 24ܦܩܸܕܠܹܗ ܪܲܒܐܲܠܦܵܐ ܕܡܲܥܒܼܸܪܝܼ ܠܹܗ ܓܵܘ ܩܲܠܥܵܐ؛ ܘܦܩܸܕܠܹܗ ܕܒܓ̰ܘܼܢܓ̰ܵܪܹ̈ܐ ܦܵܐܹܫ ܗَܘܵܐ ܨܘܼܚܨܝܼܵܐ؛ ܕܵܐܟܼܝܼ ܕܝܵܕܹܥ ܗَܘܵܐ ܥܲܠ ܡܘܼܕܝܼ ܗܲܓ̰ܲܬ ܡܲܩܘܘܼܚܹܐ ܗَܘܵܘ ܗܲܕܟܼܵܐ ܥܲܠܘܼܗܝ. 25ܘܟܲܕ ܡܬܝܼܚܘܼܗܝ ܗَܘܵܘ ܒܬܲܣܡܵܬܹ̈ܐ؛ ܐَܡܸܪܹܗ ܦܵܘܠܘܿܣ ܠܩܸܢܛܪܘܿܢܵܐ ܕܟܸܠܝܵܐ ܗَܘܵܐ ܥܲܠܘܼܗܝ؛ ܒܕܲܣܬܘܼܪ ܝ݇ܠܵܗ̇ ܐܸܠܵܘܟܼܘܿܢ ܕܓ̰ܲܢܓ̰ܪܝܼܬܘܿܢ ܠܓܲܒܼܪܵܐ ܪܗ݇ܘܿܡܵܝܵܐ ܕܠܵܐ ܥܒܼܝܼܕܵܐ ܓܘܼܢܵܗܟܵܪ؟ 26ܘܟܲܕ ܫܡܸܥܠܹܗ ܩܸܢܛܪܘܿܢܵܐ؛ ܐ݇ܬܹܐܠܹܗ ܠܟܸܣ ܪܲܒܐܲܠܦܵܐ ܗܘܼܩܹܠܹܗ؛ ܘܐَܡܸܪܹܗ ܐܸܠܹܗ؛ ܡܘܼܕܝܼ ܒܸܥܒܼܵܕܵܐ ܝَܘܸܬ؟ ܣܵܒܵܒ ܐܵܗܵܐ ܓܲܒܼܪܵܐ ܪܗ݇ܘܿܡܵܝܵܐ ܝ݇ܠܹܗ. 27ܘܐ݇ܬܹܐܠܹܗ ܠܟܸܣܠܹܗ ܪܲܒܐܲܠܦܵܐ؛ ܘܐَܡܸܪܹܗ ܐܸܠܹܗ؛ ܐ݇ܡܘܿܪ ܐܸܠܝܼ؛ ܐܲܢ݇ܬ ܪܗ݇ܘܿܡܵܝܵܐ ܝَܘܸܬ؟ ܘܐَܡܸܪܹܗ ܐܸܠܹܗ؛ ܗܹܐ. 28ܓ̰ܘܼܘܸܒܠܹܗ ܪܲܒܐܲܠܦܵܐ ܘܐَܡܸܪܹܗ ܐܸܠܹܗ؛ ܐܵܢܵܐ ܒܪܵܒܵܐ ܙܘܼܙܹ̈ܐ ܩܸܢܝܵܐܠܝܼ ܐܵܗܵܐ ܚܹܐܪܘܼܬܼܵܐ (ܠܪܗَܘܿܡܵܝܘܼܬܼܵܐ). ܘܐَܡܸܪܹܗ ܐܸܠܹܗ ܦܵܘܠܘܿܣ؛ ܐܝܼܢܵܐ ܐܵܢܵܐ ܒܝܼܵܗ̇ ܦܸܫܠܝܼ ܝܠܝܼܕܵܐ. 29ܘܒܗ̇ܝ ܣܵܥܲܬܿ ܦܪܸܩܠܗܘܿܢ ܡܸܢܹܗ ܐܵܢܝܼ ܕܗܕܝܼܪܹܐ ܗَܘܵܘ ܠܸܡܚܵܝܹܗ؛ ܘ ܪܲܒܐܲܠܦܵܐ ܙܕܸܥܠܹܗ ܟܲܕ ܝ݇ܕܸܥܠܹܗ ܕܪܗ݇ܘܿܡܵܝܵܐ ܗَܘܵܐ؛ ܣܵܒܵܒ ܕܐ݇ܣܝܼܪܘܼܗܝ ܗَܘܵܐ. 30ܘܒܝܵܘܡܵܐ ܐ݇ܚܹܪ݇ܢܵܐ؛ ܒܣܸܡܠܵܐ ܠܹܗ ܠܝܼܕܵܥܝܵܐ ܒܫܲܪܝܼܪܘܼܬܵܐ ܕܡܘܼܕܝܼ ܗَܘܵܐ ܕܲܪܗܲܩܘܼܬܵܐ ܕܒܸܡܚܵܝܵܐ ܗَܘܵܘ ܥܲܠܘܼܗܝ ܝ݇ܗܘܼܕܵܝܹ̈ܐ؛ ܘܫܪܹܐܠܹܗ؛ ܘܦܩܸܕܠܹܗ ܕܓ̰ܲܡܥܝܼ ܓܘܼܪ̈ܵܢܹܐ ܕܟܵܗܢܹ̈ܐ ܘܟܠܹܗ ܟܸܢܫܵܝܗܝ ܕܪܵܐܝܝܼ؛ ܘܠܦܵܘܠܘܿܣ ܡܘܼܨܠܹܐܠܹܗ ܘܡܘܼܩܸܡܠܹܗ ܓܵܘܵܝܗܝ.